उस्मानाबाद जिल्ह्यातल्या तुळजापूर तालुक्यातलं मंगरूळ . सप्टेंबर महिन्यातली 9 तारीख. सरडे कुटुंबासाठी अत्यंत आनंदाचा दिवस. सरडे कुटुंबातल्या संदीप आणि पूजा यांना मुलगी झाली होती .
स्त्री-पुरुष समानतेच्या कितीही गोष्टी होत असल्या तरी अजूनही अनेक ठिकाणी दोघांच्या जन्माचं स्वागत वेगवेगळ्या पद्धतीनं होतं. प्राथमिक आरोग्य केंद्र मंगरूळअंतर्गत येणाऱ्या २५ गावांमधलं २०१८-१९ मधलं लिंग गुणोत्तराचं प्रमाण ८६१. वर्ष २०१६-१७ मधलं ८९५ तर २०१५-१६ मधलं १२५७.
मुलीच्या जन्माचं स्वागत करण्याचा संदेश आपण आपल्या घरापासून देऊया असं नंदिनी सरडे आणि त्यांचा मुलगा संदीप यांनी ठरवलं . नंदिनीताई माजी जिल्हा परिषद सदस्य, त्यांचे पती प्रतापसिंह उपसरपंच. संदीप यांनी नेदरलँडमधून प्लॅन्ट सायन्समध्ये डॉक्टरेट मिळवली असून तिथल्या कृषी संशोधन केंद्रात ते कार्यरत आहेत. पत्नी पूजा मूळच्या कळंबमधल्या. त्या एम एससी झाल्या आहेत. मुलगा असो व मुलगी, ते मूल आपलं आहे, हा सरडे कुटुंबातल्या सर्वांचा विचार. तो परिसरात पोहोचावा, स्त्री-भ्रूण हत्या थांबाव्यात यासाठी मुलीचं स्वागतही समारंभाकपूर्वक.
मुलीला गावात आणलं. बसस्थानक ते घरापर्यंत रांगोळी. रस्त्यावर पुष्पवृष्टी. बॅण्डपथक आणि फटाक्यांची आतषबाजी. पेढ्यांचं वाटप. या स्वागताची संपूर्ण पंचक्रोशीत चर्चा आहे. मुलीच्या जन्माचंही स्वागत झालं पाहिजे अशी ग्रामस्थांमध्ये चर्चा आहे.
- अनिल आगलावे, उस्मानाबाद
No comments:
Post a Comment