ज्योत से ज्योत जगाते चलो

 गोष्ट गेल्या बुधवारची. नंदुरबार जिल्ह्यातल्या सातपुड्याच्या पर्वतरांगांमधली. तोरणमाळ आणि आसपासच्या दुर्गम पर्वतरांगांमधल्या गरीब आदिवासींना दिवाळी साजरी करता यावी यासाठीच्या प्रयत्नांची.
तोरणमाळ, महाराष्ट्रातलं दुसऱ्या क्रमांकाचं थंड हवेचं ठिकाण. मात्र विकासापासून वंचितच. डोंगरावरील पारंपरिक शेतीशिवाय उत्पन्नाचं कुठलंही साधन नाही.
सातपुड्याच्या डोंगररांगांमध्ये दिवाळी साजरी व्हावी यासाठी काही युवक प्रयत्न करतात. मूळचे शहाद्याचे पण नोकरीव्यवसायानिमित्त परराज्यात, परदेशात स्थायिक झालेले हे युवक. सर्वसामान्य कुटुंबातले. सात वर्षांपूर्वी समर्पण या व्हाट्सअप ग्रुपच्या माध्यमातून एकत्र आलेले. २२६ जण. त्यासाठी पुढाकार घेतला,ग्रुपला आकार दिला, दिवंगत महेश पाटील यांनी. 

महेश व्यवसायासाठी पुण्यात स्थायिक झालेले. रक्तदान शिबीर, सातपुड्यात दिवाळी मदत, माणुसकीची भिंत या माध्यमातून गरजूंना हात देणारे. गेल्या वर्षी त्यांचा अचानक मृत्यू झाला. महेश यांना साथ लाभली सौरभ जहागिरदार आणि प्रशांत पाटील यांची.
सहा वर्षांपासून सुरू असलेला दिवाळी मदतीचा उपक्रम यंदा ३० ऑक्टोबरला थाटात झाला. यावेळी १५० किलो चिवडा,३० किलो सोनपापडी, ८००बिस्कीटपुडे, १२०० कैडबरी चौकलेट, ३५० चप्पल जोड, १७५ ब्लैंकेटस, ३५० मुलांचे ड्रेस, ४५ साल, २५५ मोठ्या मुलांचे ड्रेस, २५५ लहान मुलींचे ड्रेस, ३५ लहान मुलांचे स्वेटर, १५५ मोठ्या मुलांचे स्वेटर, ४५ कानटोप्या, ६५ मोठ्या माणसांचे ड्रेस, ६५ साड्या व २५० फरसाण पाकीट आणि २३०० चॉकलेट्सचे बॉक्स यामुळे पाड्यांवर आनंदाच्या ज्योती उजळल्या होत्या. 
- रुपेश जाधव, नंदुरबार