स्वतःच्या अडचणींची जाणीव, वंचितांसाठी सुरू केला मदतयज्ञ

 वडिलांचे छत्र हरपले अन‌् आर्थिक अडचणींमुळे अवघे बालपण करपले. अभ्यासात पुढे असूनही एक वही घेणंही शक्य होत नसायचं. दारिद्र्याची ही बोचरी जाणीव प्रेरणा बनवून बीड येथील सीमा मनोज ओस्तवाल यांनी सामाजिक क्षेत्रात पाऊल टाकले. गुरु आनंद महिला प्रतिष्ठाणच्या माध्यमातून सीमा या गेल्या नऊ वर्षांपासून ११ झेडपी शाळेतील गोरगरीब विद्यार्थ्यांना शालेय साहित्य, रूग्णांसाठी आरोग्य शिबिरं, वंचितांना किराणा साहित्य, महिलांसाठी कौशल्य विकास शिबिर घेतात. त्यांच्या या प्रयत्नांतून अनेकांच्या दुखा:वर फुंकर देण्याचे काम होत आहे.
बीड येथील सीमा ओस्तवाल यांनी वंचित, दुर्बलांसाठी कार्य करण्याच्या उद्देशातून सन २०१० मध्ये गुरु आनंद महिला प्रतिष्ठाणच्या माध्यमातून सेवाकार्याचा श्रीगणेशा केला. दुष्काळाच्या दिवसांत पेंडगाव येथे सप्ताह घेत भुकेल्यांसाठी अन्नछत्र सुरु केले. या पहिल्याच उपक्रमातून मनस्वी आनंद मिळाला. त्यानंतर दरवर्षी ११ झेडपी शाळेतील गरजू मुलांसाठी वह्या, पेन, पेन्सिल असे साहित्य उपलब्ध करुन देण्यास सुरुवात केली. या व्यतिरिक्त १४० रूग्णांच्या मोतीबिंदू शस्त्रक्रिया व बाराशे रूग्णांची मोफत नेत्र तपासणी केली. महिलांना आर्थिक दृष्ट्या स्वयंपूर्ण व्हाव्यात, यासाठी अडीचशे जणींना ब्युटीपार्लर, शिवण काम व इतर कौशल्य विकासाचे प्रशिक्षण दिले. यातून अनेक महिला, युवती आज स्वत:च्या पायावर उभ्या आहेत. यासह दरवर्षी दिवाळीचे औचित्य साधून शंभरावर कुटुंबांना किराणा साहित्य देत त्यांचा सण गोड केला. यंदाच्या दिवाळीत तर ही मदत २०० कुटुंबांपर्यंत पोहोचवण्यात आली. अशा सातत्यपूर्ण उपक्रमांतून गुरु आनंद महिला प्रतिष्ठा सामाजिक दायित्व निभावण्याचे कार्य करतेय. सामाजिक कार्याचा परीघ उत्तरोत्तर विस्तारण्याच्या गुरू आनंद महिला प्रतिष्ठानच्या पदाधिकाऱ्यांचा मनोदय आहे.

- अनंत वैद्य